Məhəmməd Qocayev 1927-ci ildə Borçalı qəzası Kəndli Gənclər Məktəbini bitirmişdir.

1933-cü ildə ZSFSRZ Xalq Komissarları Soveti nəzdində Ali Kommunist Kənd Təsərrüfatı Məktəbinə daxil olur və həmin ali təhsil ocağını 1935-ci ildə uğurla başa vurur.

1951-54-cü illərdə Gürcüstan Kommunist Partiyası  MK nəzdində 3 illik Ali Partiya Məktəbində təhsil almışdır. 

Məhəmməd Qəmbər oğlu Qocayevin uşaqlığı və erkən gəncliyi Tiflis quberniyasının Borçalı qəzasının Qaçağan kəndində keçmişdir. 1917-ci ildə atasını itirən 5 yaşlı Məhəmməd Qocayev, anası Xeyransa Alı qızının himayəsində qalmış və tərbiyə olunmuşdur. 1927-ci ildə Məhəmməd Qocayev komsomol sıralarina qəbul olunur,1929-cu ildə Kəndli Gənclər Məktəbini bitirir. 1930-cu ildə Gürcüstan SSR Maarif Komissarlığının Tbilisidə 6aylıq kursuna daxil olur. Oranı bitirdikdən sonra Borçalı rayonunun Betarabçı kənd dördillik məktəbinə müdir təyin edilir. 1932-ci ildə Qaçağan kənd sovetliyinin katibi, sonra kənd sovet sədrinin müavini seçilir. 1933-cü ildə Gürcüstan KP Borçalı Rayon Partiya Komitəsi Bürosunun qərarı ilə Tbilisi şəhərindəki Zaqafqaziya Ali Kommunist Kənd Təsərrüfatı Məktəbinə təhsil almağa göndərilir.1935-ci ildə Gürcüstan LKGİ MK bürosunun qərarı ilə Borçalı rayon komsomol komitəsində təlimatçı-təbliğatçı vəzifəsinə təyinat almışdır.

Məhəmməd Qocayev 1936-cı ildə Borçalı qəzasının Qaçağan-Qasımlı inzibati ərazi bölgüsünü əhatə edən "Gündoğan" kolxozu İdarə Heyətinin sədri seçilir. 1938-ci ildə Gürcüstan SSR Kənd Təsərüffatı Xalq Komissarlığının Borçalı rayonu üzrə Tədarük İdarəsinə direktor təyin edilir və eyni zamanda Borçalı rayon İstehlak İdarəsinin sədri seçilir. 

1939-cu ildə Borçalı Rayonunun Xalq Maarif Şöbəsinin müdiri vəzifəsinə keçirilir. 1940–1945-ci illərdə əvvəl Sarvan, sonra Şulaver Maşın-Traktor stansiyalarının direktoru olmuşdur. 1946-cı ildə "Sosializm"kolxozunun İH sədri seçilir. "Sosializm"kolxozununİH sədri Məhəmməd Qocayev kənd təsərrüfatı məhsullarının, xüsusilə tütüncülüyün inkişafında göstərdiyi yüksək təşkilatçılıq və təşəbbüskarlıq hünərinə görə SSRİ Ali Soveti Rəyasət Heyətinin 3may 1949-cu il tarixli Fərmanı ilə Lenin ordeni və "Oraq-Çəkic Qızıl Ulduz" medalı təqdim edilməklə SSRİ Sosialist Əməyi Qəhramanı adına layiq görülür.

1949-51-ci illərdə Gürcüstan SSR Marneuli rayon Xalq Deputatları Soveti İcraiyyə Komitəsinin sədri vəzifəsində çalışır, 1949-cu ildə Marneuli adlandırılan Borçalı rayonun inkişafı uğrunda hərtərəfli qabiliyyət nümayiş etdirir. SSRİ Ali Soveti Rəyasət Heyətinin fərmanı ilə 1951-ci ildə ikinci dəfə Lenin ordeni ilə təltif olunur. 

1951-ci ildən 1960-cı ilə qədər Gürcüstan Kommunist Partiyası Mərkəzi Komitəsinin üzvü vəzifəsini tutmuşdur.

1954-cü ildə Marneuli yağ-süd zavoduna direktor təyin edilir. 1957-ci ildə "Qırmızı Körpü" maşın-traktor stansiyasının direktoru vəzifəsinə keçirilir. 1963-cü ilə qədər həmin vəzifədə çalışan Məhəmməd Qocayev kənd təsərrüfatı texnikasının təmiri və bərpası sahəsində yüksək təşkilatçılıq, işgüzarlıq nümayış etdirir. 

1963-cü ildə Məhəmməd Qocayev regionun 5 bölgəsinə(Marneuli, Bolnisi, Dmanisi, Tetriskaro, Çalka) xidmət göstərən Taxıl Məhsulu Tədarükü kombinatına baş direktor göndərilir. 1966-cı ildə Məhəmməd Qocayev "Şərəf nişanı" ordeni ilə təltif olunur. 1969-cu ildə Alget tərəvəzçilik-südçülük sovxozuna direktor vəzifəsinə təyin edilir. 1970–72-ci illərdə Məhəmməd Qocayev Marneuli Baş Pendir-Yağ-Süd zavodunun direktoru vəzifəsində çalışır.

Məhəmməd Qocayev 27 noyabr 1972-ci ildə Gürücstan SSR-in Marneuli şəhərində vəfat etmiş və Marneuli rayonu Qaçağan kənd məzarlığında dəfn edilmişdir.